Hərəkətli bazarlara həftəlik baxış

Daxili bazar

• Ötən həftə AR Maliyyə Nazirliyinin 3 illik istiqrazlarının yerləşdirilməsi üzrə keçirilmiş hərrac hərrac zamanı təqdim olunan gəlirlilik dərəcələrinin Emitenti qane etmədiyi səbəbindən baş tutmadı. Fevral ayında 3 illik istiqrazlar üzrə orta ölçülmüş gəlirlilik 8.04%, kəsmə gəlirlilik 8.23% olmuşdur. Bu həftə, 19 mart tarixində 150 milyon AZN həcmində AR Maliyyə Nazirliyinin 1 illik istiqrazlarının yerləşdirilməsi üzrə hərrac keçiriləcək. Fevral ayında 1 illik istiqrazlar üzrə orta ölçülmüş və kəsmə gəlirliliklər 7.05% və 7.24% olmuşdur.
• 13-14 mart tarixlərində keçirilən hərraclarda AR Mərkəzi Bankının notları üzrə orta ölçülmüş gəlirliliklər 6.80%-6.95% aralığında olmuş, hər biri 30 milyon AZN olmaqla, 120 milyon AZN vəsait yerləşdirilmişdir.
• Ötən həftə Azərbaycanda fevral ayı üzrə inflyasiya məlumatı açıqlandı. Məlumata əsasən, inflyasiya azalan tendensiyada davam etməkdədir. Belə ki, bu ilin yanvar-fevral aylarında Azərbaycanda istehlak qiymətləri indeksi (inflyasiya göstəricisi) ötən ilin eyni dövrünə nisbətən 1,3%, o cümlədən qida məhsulları, içkilər və tütün məmulatları üzrə 0,2%, qeyri-qida məhsulları üzrə 1,6%, əhaliyə göstərilmiş ödənişli xidmətlər üzrə 2,7% artıb.
• Növbəti həftə, 28 mart tarixində AR Mərkəzi Bankı faiz dəhlizi ilə bağlı qərarını açıqlayacaq. Mərkəzi Bankın ötən iclasında verdiyi məlumata əsasən qərarlar xarici və daxili inflyasiya amillərinin dəyişməsindən asılı olaraq veriləcəkdir. Qərarlar qəbul edilərkən ölkədə pul siyasətinin ötürücülüyünün xüsusiyyətləri, maliyyə bazarlarında, o cümlədən valyuta bazarında gedən proseslər də nəzərə alınacaqdır. Qeyd olunan risklərin reallaşmaması halında pul siyasətinin ilin qalan dövründə də mərhələlərlə yumşaldılması imkanlarına baxılacaqdır. Ötən iclasda Azərbaycan Respublikası Mərkəzi Bankının İdarə Heyətinin qərarı ilə uçot dərəcəsi 8%-dən 7.75%-ə, faiz dəhlizinin aşağı həddi 6.5%-dən 6.25%-ə, faiz dəhlizinin yuxarı həddi isə 9%-dən 8.75%-ə endirilmişdir.

Qlobal bazar

• 12 mart tarixində açıqlanan məlumata əsasən ABŞ-da inflyasiya artaraq 3.1%-dən 3.2%-ə yüksəlmişdir. İnflyasiyanın gözləntilərdən yüksək çıxması səhm bazarlarına mənfi təsir göstərmiş, ABŞ-ın səhm indeksləri bir qədər geriləmişdir.
• 20 mart tarixində ABŞ maliyyə bazarları üçün daha bir əhəmiyyətli məlumat açıqlanacaqdır. Belə ki, Bakı vaxtı ilə 22:00-da ABŞ FED faiz dərəcələri ilə bağlı qərarını açıqlayacaq. Faizlərin dəyişdirilməyərək 5.25%-5.50% həddində saxlanılacağı proqnoz edilir.
• 18 mart tarixində Avrozonada fevral ayı üçün illik yekun inflyasiya məlumatı açıqlanacaq. İnflyasiyanın 2.6% açıqlanacağı proqnoz edilir.
• İnvestorların diqqət mərkəzində olan qərarlardan biri də 21 mart tarixində açıqlanacaq İngiltərə Mərkəzi Bankının faiz qərarı olacaq. Gözlənti odur ki, İngiltərə Mərkəzi Bankı da gözləmə mövqeyi tutaraq faizləri 5.25% həddində saxlayacaq.
• Rusiyada illik inflyasiya artaraq 7.44%-dən 7.69%-ə yüksəlmişdir.
• 21 mart tarixində Türkiyə, 22 mart tarixində isə Rusiya Mərkəzi Bankı pul siyasəti ilə bağlı faiz qərarlarını açıqlayacaqlar. Hər iki bankın gözləmə mövqeyi tutaraq faizləri sabit saxlayacağı gözlənilir. Hazırda Türkiyədə faiz dərəcəsi 45%, Rusiyada isə 16%-dir.