Maliyyə bazarlarına həftəlik analitikası

Daxili bazar

• Ötən həftə AR Maliyyə Nazirliyinin 1 illik istiqrazlarının yerləşdirilməsi üzrə hərrac keçirilmişdir. Hərracda orta ölçülmüş və kəsmə gəlirlilik 7.90% və 8.00% olmuş, 120 milyon AZN yerləşdirilmişdir. Bu həftə AR Maliyyə Nazirliyinin 55 milyon AZN həcmində, 3 illik (effektiv gün 903) istiqrazlarının yerləşdirilməsi planlaşdırılır.
• 25-26 oktyabr tarixlərində AR Mərkəzi Bankının 6 aylıq və 9 aylıq notlarının yerləşdirilməsi üzrə keçirilən hərraclarda notların gəlirlilikləri cüzi azalmış, orta ölçülmüş gəlirlilik 6 aylıq notlarda 8.17%-dən 8.09%-ə, 9 aylıq notlarda isə 8.28%-dən 8.21%-ə düşmüşdür.
• Azərbaycanda iqtisadi artım məlumatı açıqlanıb. Ümum Daxili Məhsul artımı 0.8% olmuşdur.
• 1 noyabr tarixində AR Mərkəzi Bankı pul siyasəti ilə bağlı növbəti faiz qərarını açıqlayacaq və bununla bağlı mətbuat konfransı keçirəcəkdir. Qərar inflyasiyanın xarici və daxili amilləri üzrə risk balansının dəyişimi və yenilənmiş makroiqtisadi proqnozlar nəzərə alınmaqla qəbul ediləcəkdir. Xatırladaq ki, ötən iclasdan bəri illik inflyasiya tempində azalma meyilləri müşahidə edilmişdir. Sentyabr ayında da deflyasiya baş vermiş, inflyasiya dərəcəsi 11.7%-dən 10.9%-ə düşmüşdür (ötən ilin sonunda inflyasiya dərəcəsi 13.9% idi). Öncəki iclasda AR Mərkəzi Bankının qərarı ilə uçot dərəcəsi 9%, faiz dəhlizinin aşağı həddi 7.5%, faiz dəhlizinin yuxarı həddi isə 10% səviyyəsində dəyişməz saxlanılmışdı.

Qlobal bazar

• Amerikada 3-cü rüb üzrə iqtisadi artım gözləntiləri və 2-ci rübün nəticələrini üstələyərək 2.1%-dən 4.9%-ə qalxmışdır. Analitiklər artımın 4.5% olacağını proqozlaşdırırdılar.
• 1 noyabr tarixində ABŞ Federal Ehtiyatlar Sistemi pul siyasəti ilə bağlı növbəti faiz qərarını açıqlayacaq. Faizlərin dəyişdirilməyərək 5.25%-5.50% həddində saxlanılacağı gözlənilir.
• 3 noyabr tarixində ABŞ-da əsas məşğulluq göstəricisi olan qeyri-kənd təsərrüfatı sahələrində iş yerlərinin sayındakı dəyişiklik məlumatı və işsizlik dərəcəsi açıqlanacaq. İş yerlərindəki dəyişiklik sayının azalaraq 336k-dan 190k-a düşəcəyi, işsizliyin isə 3.8% qalacağı gözlənilir.
• 26 oktyabr tarixində Avropa Mərkəzi Bankı uçot faiz dərəcəsini dəyişməyərək 4.50% həddində saxladı.
• Bu həftə həmçinin Avrozonada iqtisadi artım və işsizlik dərəcəsi açıqlanacaq. İqtisadi artımın azalaraq 0.5%-dən 0.2%-ə düşəcəyi, işsizliyin isə 6.4% qalacağı proqnoz edilir.
• Ötən həftə Türkiyə Mərkəzi Bankı yüksək inflyasiya səbəbilə faiz dərəcəsini 30%-dən 35%-ə qaldırdı. Faizlərin artımına baxmayaraq türk lirəsi hələ də dəyər itirməkdə davam edir. Nəzərinizə çatdıraq ki, Türkiyədə inflyasiya son məlumata əsasən 61.53%-dir və 3 noyabr tarixində açıqlanacaq məlumatda inflyasiyanın 62.40%-ə qalxacağı gözlənilir.
• Rusiya Mərkəzi Bankı da keçən həftə əsas faiz dərəcəsini 13%-dən 15%-ə qaldırdı. Rusiyada da sentyabr ayında inflyasiyada artım tempi müşahidə edilmiş, inflyasiya 5.15%-dən 6.00%-ə qalxmışdır.