Maliyyə bazarlarına həftəlik baxış

Daxili bazar

• 17 oktyabr 2023-cü il tarixində Bakı Fond Birjasında Azərbaycan Respublikası Maliyyə Nazirliyinin 90 mln manat həcmində, 728 gün tədavül müddətli dövlət ortamüddətli istiqrazlarının (DOİ) yerləşdirilməsi üzrə hərrac keçirilmişdir. Hərrac zamanı 25 investor tərəfindən qiymət intervalı 89.6046 (12%) manat və 97.2615 (7.4999%) manat olan 48 sifariş təqdim edilmişdir. Maliyyə Nazirliyinin qərarına əsasən istiqrazların kəsmə qiyməti 95.6645 (8.4%) manat, orta ölçülmüş qiyməti isə 95.9785 (8.2215%) manat müəyyən edilmişdir. Sifarişlərin nominal qiymətlə ümumi məbləği 211,434,300 manat, yerləşdirilmiş həcmi isə 135,000,000 manat təşkil edilmişdir.
• Bu həftə AR Maliyyə Nazirliyinin 80 milyon AZN həcmində 1 illik istiqrazlarının yerləşdirilməsi üzrə hərrac keçiriləcək. Sonuncu dəfə oktyabr ayının 3-ü keçirilmiş 1 illik hərracda istiqrazların orta ölçülmüş gəlirliyi 7.61% olmuşdur. Həmçinin, oktyabr ayının sonuncu həftəsində 55 milyon AZN həcmində 3 illik istiqrazların yerləşdirilməsi planlaşdırılır.
• AR Mərkəzi Bankının notlarında keçən həftəki hərraclarda əsaslı dəyişiklik olmamış, hər biri 20 milyon AZN olmaqla 3, 6, 9 aylıq notlar yerləşdirilmişdir. 1 aylıq notlar üzrə yerləşdirmə isə ardıcıl olaraq 4 həftədir ki, hərrac zamanı investorlar tərəfindən təklif olunan sifarişlər buraxılış şərtlərində Emitent tərəfindən iştirakçı sayı ilə bağlı müəyyən edilmiş tələbə uyğun olmadığından baş tutmamışdır.

Qlobal bazar

• ABŞ-da keçən həftə mövcud satılmış evlərin sayı açıqlanıb. Əvvəlki ay ilə müqayisədə sentyabr ayında bu göstərici 2% azalıb (bazarın gözləntisi -3,7% azalma idi).
• Keçən həftə Avropada açıqlanmış əsas məlumatlar içərisində sentyabr ayı üçün olan yenilənmiş inflyasiya göstəriciləri olub. Belə ki, illik inflyasiya dəyişməz olaraq 4,3%, aylıq inflyasiya 0,3%, Core İnflyasiya isə illik dəyişməz olaraq 4,5% açıqlanıb. Bu həftənin vacib məlumatları içərisində oktyabr ayının 26-sı Avropa Mərkəzi Bankının açıqlanacaq faiz qərarı olacaq. Maliyyə bazarları uçot faiz dərəcəsinin dəyişməz olaraq 4,5% saxlanılacağını proqnozlaşdırır.
• Rusiyada Mərkəzi Bank bu həftə faiz qərarını açıqlayacaq. Əvvəlki göstərici 13% olub, gözlənti isə onun 1% artırılmasıdır.
• Türkiyədə bu həftə faiz qərarı açıqlanacaq. Əvvəlki göstərici 30% olub, gözlənti onun 5% artırılaraq 35% olacağıdır.