Foreks bazarının həftəlik təqvimi və analitikası 28.04.025 -04.05.2025

UForexcari həftənin mühüm xəbərlərini nəzərinizə çatdırır:

Ötən həftənin əvvəlində maliyyə bazarlarında satışlar artsa da, həftənin ikinci yarısında vəziyyət sabitləşdi. ABŞ-nin texnologiya sektoru, xüsusilə Nasdaq indeksi, artıma rəhbərlik etdi. Avropa bazarları da yüksəldi, DAX və FTSE indeksləri tarixi maksimumlara yaxınlaşdı. Bazarların canlanmasına ABŞ və Çin arasında ticarət gərginliyinin azala biləcəyinə dair xəbərlər təsir etdi. Prezident Donald Tramp Çin məhsullarına tətbiq edilən tariflərin azaldıla biləcəyini bildirdi və bu da investorların əhvalını müsbət istiqamətə dəyişdi. Həmçinin Trampın Federal Ehtiyat Sisteminin (FED) rəhbəri Cerom Pauelli vəzifədən uzaqlaşdırmaq planlarından imtina etməsi də bazarlara dəstək verdi.

Buna baxmayaraq, fundamental risklər qalır. Həm ABŞ-də, həm də Avrozonada biznes aktivliyini ölçən PMI göstəriciləri iqtisadi artımın zəiflədiyini göstərdi. Bazar iştirakçıları makroiqtisadi göstəricilərə və ticarət danışıqlarındakı irəliləyişə diqqətlə nəzarət edir.

ABŞ

ABŞ dolları indeksi (DXY) mart ayının əvvəlindən bəri təxminən 9% dəyər itirmişdi, lakin ötən həftə 98.00 səviyyəsindən geri dönərək dörd həftəlik eniş seriyasını qırdı. Buna baxmayaraq, dolların dirçəlişi ABŞ dövlət istiqrazlarının gəlirliyinin aşağı düşməsi fonunda baş verdi və bu da dollar üzərində təzyiqin davam etdiyini göstərir.

Federal Ehtiyat Sistemi mart iclasında faiz dərəcəsini 4.25%-4.50% diapazonunda sabit saxladı, 2025-ci il üzrə iqtisadi artım proqnozunu 1.7%-ə endirdi və inflyasiya proqnozunu 2.7%-ə qaldırdı. FED-in rəhbəri Cerom Pauell bildirdi ki, yeni tətbiq olunan tariflər gözləniləndən yüksək olub və inflyasiya təzyiqini artırmaqla yanaşı, iqtisadi artımı zəiflədə bilər. Pauell əlavə etdi ki, FED hazırkı iqtisadi vəziyyəti izləyəcək və yalnız əlavə məlumatlar əldə edildikdən sonra faiz siyasətində dəyişikliklər edəcək.

İnflyasiya göstəriciləri hələ də FED-in 2%-lik hədəfindən yüksəkdir və New York FED-inin son araşdırmasına görə, amerikalılar növbəti bir il ərzində 3.6% qiymət artımı gözləyirlər. İqtisadi zəifləmə və inflyasiya riskləri fonunda ABŞ dolları üzərində təzyiqlər davam edir.

29 aprel

18:00 – İstehlakçı güvən indeksi (aprel)

18:00 – “JOLTS” əmək birjasında açıq vakansiyaların sayı (mart)

30 aprel

16:15 – ADP-dən qeyri-kənd təsərrüfatı sektorunda məşğulluq göstəricisi (aprel)

16:30 – Ümumi daxili məhsul göstəricisi (1-ci rüb)
18:00 – Şəxsi istehlak xərcləri üzrə əsas qiymət indeksi (aylıq) (mart)

18:00 – Şəxsi istehlak xərcləri üzrə əsas qiymət indeksi (illik) (mart)

18:30 – Xam neft ehtiyatları

1 may

16:30 – İşsizlik müavinətləri üzrə ilkin müraciətlərin sayı

17:45 – İstehsal sektorunda biznes aktivliyinin indeksi (PMI) (aprel)

18:00 – ISM-dən istehsal sektorunda biznes aktivliyinin indeksi (PMI) (aprel)

2 may

16:30 – Saatlıq orta əməkhaqqı (aprel)

16:30 – Qeyri-kənd təsərrüfatı sektorunda məşğulluq göstəricisi (aprel)

16:30 – İşsizlik göstəricisi (aprel)

Avrozona

Avro ötən həftə bir qədər geriləsə də, ümumilikdə güclü mövqeyini qoruyub saxladı. EUR/USD cütlüyü 2021-ci ilin noyabrından bəri ən yüksək səviyyəsi olan 1.1573-ə yüksəldi, lakin sonra 1.1360 səviyyəsinə qədər gerilədi. Texniki baxımdan, avronun əsas hərəkətli ortalamaların üzərində qalması tendensiyanın müsbət olduğunu göstərir.

Avrozonada açıqlanan makroiqtisadi göstəricilər iqtisadi zəifləmənin davam etdiyini təsdiqlədi. Aprel ayı üçün sənaye PMI 48.7, xidmət sektoru PMI isə 49.7 səviyyəsində olub ki, bu da iqtisadi fəaliyyətin daraldığını göstərir. Digər tərəfdən, Almaniyada biznes mühiti üzrə göstərici (IFO indeksi) 86.9 səviyyəsinə yüksəlib və bazar gözləntilərini üstələyib.

Yaxın günlərdə Almaniya və Avrozonanın ÜDM (Ümumi Daxili Məhsul) göstəriciləri, həmçinin inflyasiya (HICP) məlumatlarının açıqlanması gözlənilir. Bu məlumatlar EUR/USD cütlüyünün gələcək istiqamətinə ciddi təsir göstərə bilər.

30 aprel

12:00 – Almaniyada ümumi daxili məhsul göstəricisi (1-ci rüb)

16:00 – Almaniyada istehlak qiymətləri indeksi (aprel)

2 may
13:00 – Avrozonada istehlak qiymətləri indeksi (illik) (aprel)

Cari həftənin gözləntiləri:

- Artım hədəfləri: 1.1392; 1.1479; 1.1510

- Eniş hədəfləri: 1.1304; 1.1283; 1.1246

Neft

Neft bazarında ötən həftə dəyişkən ticarət müşahidə olundu. CL neft müqaviləsi həftə ərzində daha çox yan xətt boyunca hərəkət etdi və potensial olaraq artım bazası formalaşdırdı. Bazarın yüksəlişi üçün əsas hədəf 65 dollar səviyyəsidir. Əgər bu səviyyə qırılsa, bazarda yeni alış dalğası yarana bilər.

Ticarət mübahisələrinin yumşaldılması da neft bazarına müsbət təsir edə bilər, çünki qlobal ticarət axınlarının normallaşması enerji daşıyıcılarına tələbatı artırar. Lakin bazar hələ də qeyri-müəyyənlik şəraitindədir və qiymətlərin dəyişkən qalacağı gözlənilir.

Cari həftənin gözləntiləri: (WTI)

- Artım hədəfləri: 69,37;76,74; 81,20

- Eniş hədəfləri: 57,54; 53,08; 45,71

Cari həftənin gözləntiləri: (Brent)

- Artım hədəfləri: 69,69; 72,80; 75,13

- Eniş hədəfləri: 61,25; 57,92; 52,81

Qızıl

Ötən həftə qızılın qiyməti 3500 dollara yüksələrək yeni tarixi rekord müəyyən etdi, lakin daha sonra mənfəət götürən satışların təsiri ilə qiymət bir qədər geri çəkildi. Buna baxmayaraq, investorlar arasında qızıla maraq yüksək olaraq qalır.

Hazırda qızıl 3,193–3,245 dollar dəstək zonası yaxınlığında ticarət olunur və bu zonada güclü alıcı dəstəyi müşahidə edilir. Əgər bazarda təzyiqlər artsa, növbəti dəstək səviyyəsi 3,148 dollar civarında yerləşə bilər. Davam edən inflyasiya riskləri və qlobal iqtisadi qeyri-müəyyənlik fonunda qızıl hələ də əsas təhlükəsiz liman olaraq qalır.

Cari həftənin gözləntiləri:

- Artım hədəfləri: 3353.27; 3422.70; 3488.15;

- Eniş hədəfləri: 3250.39; 3193.94; 3148.51;

Valyuta bazarında baş verən ən son yeniliklərdən xəbərdar olmaq üçün bizi “Telegram” kanalımızda izləyin!

https://t.me/uforex_az