Unicapital İnvestisiya Şirkəti “Azərbaycan Sabit gəlirli qiymətli kağızlar və REPO Forumu”nda fəal iştirak etdi

05.03.2024-cü il tarixində “AmCham Bankçılıq, Maliyyə və Sığorta” Komitəsinin təşkilatçılığı ilə “Sabit gəlirli qiymətli kağızlar və REPO” mövzusunda tədbir keçirildi.

Tədbirdə Azərbaycanda dövlət və korporativ istiqrazları və REPO bazarlarında olan mövcud imkanlar müzakirə olunub. Görüşün keçirilməsində əsas məqsəd dövlət və özəl sektor qurumları, o cümlədən maliyyə və qeyri-maliyyə sektorundan olan investorların yerli kapital bazarında iştirakının təşviqi olmuşdur.

“Unicapital” İnvestisiya Şirkəti hər zaman olduğu kimi ölkəmizdə investisiya sahəsinin və xüsusi ilə də daxili kapital bazarının inkişafına dəstək məqsədi ilə forumun uğurlu olmasına öz töhfəsini verib. Şirkətin Baş Direktoru Vüqar Namazov tədbirin açılış nitqində Azərbaycandakı investisiya xidmətlərinin bu günkü istiqamətlərindən söz açıb.

Tədbirin davamında “Unicapital İ.Ş”ASC-nin “Portfel idarəçiliyi” şöbəsinin rəhbəri Seymur İbadov “Sabit gəlir və REPO bazarları: investisiyanın effektivliyini necə artırmaq olar?” mövzusunda çıxış edib. Çıxışı zamanı o, Azərbaycan kapital bazarındakı və qlobal bazarlardakı mövcud imkanları qonaqların diqqətinə çatdırıb.

Görüş AmCham Azərbaycan, Bakı Fond Birjası, Unicapital İnvestisiya Şirkəti, Kapital Bank və Qarabağ Dirçəliş Fondunun səlahiyyətli nümayəndələrinin sözügedən mövzu ətrafında çıxışları və fikir mübadilələri fonunda davam edib.

Xatırladaq ki, Bakı Fond Birjasının ilk və ən uzun müddətli üzvü olan “Unicapital”, kapital bazarlarının inkişafına, investorlara verdiyi dəstək və xüsusi yanaşması ilə seçilir.

Ölkədə onlayn formada, platforma üzərindən istiqraz alışı da, ötən il məhz “Unicapital” İnvestisiya Şirkətinin təminatçılığı ilə mümkün olmuşdur.