Foreks bazarının həftəlik təqvimi və analitikası 08.06.2026 - 14.06.2026

UForex cari həftənin mühüm xəbərlərini nəzərinizə çatdırır:

Ötən həftə maliyyə bazarlarında əsas diqqət ABŞ iqtisadiyyatından gələn güclü göstəricilərə, Federal Ehtiyat Sisteminin (FED) faiz siyasəti ilə bağlı gözləntilərə və Yaxın Şərqdə davam edən geosiyasi gərginliyə yönəldi. ABŞ-də açıqlanan qeyri-kənd təsərrüfatı sektorunda məşğulluq hesabatı (NFP) əmək bazarının hələ də güclü olduğunu göstərdi və bu, FED-in ilin sonuna qədər faiz artımına gedə biləcəyi ehtimallarını artırdı. Bunun fonunda ABŞ dolları möhkəmləndi, qızıl isə satış təzyiqi altında qaldı.

Digər tərəfdən, ABŞ-İran münasibətləri və Hörmüz boğazı ətrafında davam edən qeyri-müəyyənlik enerji bazarlarında əsas hərəkverici güc olaraq qalır. Tərəflər arasında danışıqlar davam etsə də, yekun razılaşmanın əldə olunmaması neft bazarında risklərin tam aradan qalxmadığını göstərir. Qiymətlərdə müəyyən geriləmə müşahidə olunsa da, bazar geosiyasi risklərin tam bitdiyinə hələ inanmır.

Bu həftə investorların əsas diqqəti ABŞ-də açıqlanacaq CPI və PPI inflyasiya göstəricilərinə, həmçinin Avropa Mərkəzi Bankının (ECB) faiz qərarına yönələcək. İnflyasiyanın yüksək qalması FED və ECB-nin faiz dərəcələrini daha uzun müddət yüksək səviyyədə saxlamasına səbəb ola bilər. Bu isə dolları dəstəkləyən, qızıl və riskli aktivlər üçün isə təzyiq yaradan əsas faktor olaraq qalır.

Eyni zamanda, qlobal iqtisadiyyatda artım tempinin zəifləməsi və inflyasiyanın yüksək qalması staqflyasiya risklərini gündəmdə saxlayır. Buna görə də bazarlar həm makroiqtisadi göstəriciləri, həm də Yaxın Şərqdən gələcək xəbərləri diqqətlə izləməyə davam edəcək. Bu həftə yüksək volatilliyin davam etməsi gözlənilir.

ABŞ

ABŞ dolları keçən həftəni yüksəlişlə başa vurdu. Güclü əmək bazarı göstəriciləri və Federal Ehtiyat Sisteminin (FED) faiz dərəcələrini daha uzun müddət yüksək saxlaya biləcəyi gözləntiləri dolların mövqeyini daha da möhkəmləndirdi. Xüsusilə, may ayı üzrə açıqlanan Nonfarm Payrolls (NFP) hesabatı gözləntiləri əhəmiyyətli dərəcədə üstələdi və investorların FED-in ilin sonuna qədər əlavə 25 baza bəndi faiz artımı edə biləcəyi ehtimalını yüksəltdi.

ABŞ iqtisadiyyatı hələ də digər inkişaf etmiş iqtisadiyyatlarla müqayisədə daha dayanıqlı görünür. ISM xidmət və istehsal indeksləri bazar proqnozlarını üstələdi, JOLTS vakansiyaları və ADP məşğulluq göstəriciləri isə əmək bazarında ciddi zəifləmə olmadığını göstərdi. Bu isə FED-in inflyasiya ilə mübarizədə daha sərt mövqeyini qorumasına imkan yaradır.

FED rəsmilərinin son açıqlamalarında əsas mövzu inflyasiya olaraq qalır. Rəsmilər hesab edir ki, qiymət artımları hələ də hədəf səviyyədən yüksəkdir və mövcud faiz dərəcələri iqtisadiyyatı kifayət qədər soyutmur. Xüsusilə enerji qiymətlərinin yüksək qalması, Hörmüz boğazı ətrafında davam edən qeyri-müəyyənlik və tariflərin gecikmiş təsirləri inflyasiya risklərini artırır.

Bazar artıq faiz endirimlərini deyil, əlavə sərtləşmə ehtimalını müzakirə etməyə başlayıb. İnvestorların diqqəti qarşıdakı ABŞ CPI və PPI göstəricilərinə yönələcək. Gözləntilərdən yüksək nəticələr FED-in daha sərt (hawkish) mövqeyini gücləndirə və Dollar İndeksinin (DXY) 100.00 psixoloji səviyyəsinin üzərinə qalxmasına səbəb ola bilər.

Texniki baxımdan DXY artıq 55, 100 və 200 günlük hərəkətli ortalamaların üzərində ticarət olunur. Bu isə yüksəliş trendinin davam etdiyini göstərir. 100.00 səviyyəsinin üzərində möhkəmlənmə baş verərsə, növbəti hədəflər 100.64 və 101.98 zonaları ola bilər.

9 iyun
18:00 – Təkrar mənzil bazarında satışlar (may)

10 iyun
16:30 – İstehlak qiymətlərinin indeksi (aylıq) (may)
16:30 – İstehlak qiymətlərinin baza indeksi (aylıq) (may)
16:30 – İstehlak qiymətlərinin indeksi (illik) (may)
18:30 – Xam neft ehtiyatları

11 iyun
16:30 – İstehsalçı qiymətlərinin indeksi (aylıq) (may)
16:30 – İşsizlik müavinətləri üzrə ilkin müraciətlərin sayı

Avrozona

EUR/USD cütlüyü həftəni 1.1550 ətrafında tamamladı və aprel ayından bəri ən aşağı səviyyələrdə qalmağa davam etdi. ABŞ-dən gələn güclü makroiqtisadi göstəricilər və FED-in faiz artımı ehtimalının yüksəlməsi dolları dəstəkləyərkən, Avrozonada artımın zəifləməsi və iqtisadi aktivliyin daralma zonasında qalması avroya təzyiq göstərir.

Bazar artıq Avropa Mərkəzi Bankının (ECB) növbəti iclasda faiz artıracağını böyük ölçüdə qiymətlərə daxil edib. Lakin inflyasiya ilə yanaşı iqtisadi artımın zəifləməsi ECB-ni çətin vəziyyətə salır. Son açıqlanan PMI göstəriciləri Avrozonada biznes aktivliyinin hələ də zəif olduğunu göstərdi, pərakəndə satışlar isə istehlakın azaldığını təsdiqlədi.

ABŞ tərəfində isə vəziyyət daha güclü görünür. Əmək bazarı dayanıqlıdır, xidmət sektoru genişlənməyə davam edir və iqtisadiyyat hələ də resessiya siqnalları vermir. Bu səbəbdən bazar iştirakçıları ABŞ dollarına üstünlük verməyə davam edirlər.

Texniki baxımdan EUR/USD bütün əsas hərəkətli ortalamaların altında qalır. RSI göstəricisi satış təzyiqinin gücləndiyini göstərir. 1.1470 səviyyəsi uzunmüddətli əsas dəstək kimi çıxış edir və bu səviyyənin qırılması daha dərin eniş dalğasına yol aça bilər.

11 iyun
16:15 – Avrozonada depozitlər üzrə faiz dərəcələri (iyun)
16:15 – Avrozonada uçot faiz dərəcəsi ilə bağlı qərar (iyun)
16:45 – Avropa Mərkəzi Bankının mətbuat konfransı

12 iyun
10:00 – Almaniyada istehlak qiymətlərinin indeksi (aylıq) (may)

Cari həftənin gözləntiləri:

• Artım hədəfləri: 1.1640; 1.1690; 1.1740
• Eniş hədəfləri: 1.1500; 1.1470; 1.1200

Neft

Brent nefti həftəni 95.56 dollar ətrafında tamamladı. Qiymətlər son həftələrdə kəskin dəyişkənlik nümayiş etdirsə də, bazar hələ də Hörmüz boğazı ilə bağlı riskləri tam qiymətlərdən çıxarmayıb. ABŞ və İran arasında danışıqlar davam etsə də, yekun razılaşmanın olmaması neft bazarında ehtiyatlı mövqeni qoruyur.

Texniki baxımdan Brent hələ də yüksəliş trendindədir. Qiymətlər əsas dəstək zonalarından yuxarı qalır və alıcılar bazarı tam tərk etməyiblər. Bununla yanaşı, hər hansı müsbət geosiyasi xəbər qiymətləri aşağı çəkə bilər.

WTI nefti həftəni 88 dollar ətrafında başa vurdu. Son həftələrdə müşahidə olunan kəskin dalğalanmalar bazarın hələ də geosiyasi xəbərlərə çox həssas olduğunu göstərir. ABŞ və İran arasında mümkün razılaşma neft qiymətlərini aşağı sala bilər, lakin danışıqların pozulması və ya yeni hərbi gərginlik sürətli yüksəlişə səbəb ola bilər.

Hazırda bazarda ehtiyatlı optimizm mövcuddur. Böyük investorlar neftin uzunmüddətli perspektivdə bahalı olduğunu düşünsələr də, risklər tam aradan qalxmadığı üçün qiymətlər aşağı düşməkdə çətinlik çəkir.

Cari həftənin gözləntiləri (Brent):

• Artım hədəfləri: 103.05; 117.85; 125.05
• Eniş hədəfləri: 86.65; 80.55; 70.55

Cari həftənin gözləntiləri (WTI):

• Artım hədəfləri: 95.00; 98.00; 100.00
• Eniş hədəfləri: 85.00; 83.00; 78.00

Qızıl

Qızıl ötən həftə ciddi satış təzyiqi ilə üzləşdi. ABŞ-dən gələn güclü məşğulluq göstəriciləri, FED-in daha sərt siyasət aparacağına dair gözləntilərin artması və istiqraz gəlirliliyinin yüksəlməsi qızılın cəlbediciliyini azaltdı.

Bununla yanaşı, ABŞ və İran arasında davam edən qeyri-müəyyənlik qızılın daha sərt enişini məhdudlaşdırır. Hər hansı yeni eskalasiya təhlükəsizlik aktivlərinə tələbi yenidən artıra bilər. Lakin bazar hazırda daha çox FED siyasətinə fokuslanıb.

Bu həftə açıqlanacaq ABŞ CPI inflyasiya göstəricisi qızıl üçün əsas katalizator olacaq. İnflyasiya gözləntilərdən yüksək gələrsə, faiz artımı ehtimalları daha da yüksələcək və bu, qızıl üçün mənfi faktor olacaq.

Texniki baxımdan qızıl artıq enən üçbucaq (descending triangle) modelini aşağı istiqamətdə qırıb və 200 günlük ortalamanın altında qalır. Bu da satışların davam edə biləcəyini göstərir.

Cari həftənin gözləntiləri:

• Artım hədəfləri: 4430; 4540; 4680
• Eniş hədəfləri: 4240; 4100; 4000

https://t.me/unicapital_investment