Unicapital dayanıqlı yatırımların inkişafına töhfə vermək məqsədilə kapital bazarında yenilik edərək, investorlara daha təmiz gələcəyə yatırım etmək imkanı yaradır.

Belə ki, yaxın günlərdə “Unibank KB” ASC tərəfindən təqdim edilən yüksək gəlirli manat istiqrazlarının buraxılışı baş tutacaq. Sözügedən qiymətli kağızlar beynəlxalq yaşıl maliyyə standartlarına uyğun olaraq buraxılan maliyyə alətidir.

Faizli, sənədsiz, adlı, təmin edilməmiş istiqrazların tədavül müddəti 36 ay, nominal dəyəri 100 manat, illik faiz dərəcəsi 11,5%, kupon ödəniş dövrü hər 3 aydan bir, emissiya həcmi isə 20 milyon manat təşkil edir. Həmçinin hər ilin sonunda qiymətli kağızlar nominal dəyəri üzrə emitentə geri satıla bilər.

İstiqrazlar həm fiziki, həm də hüquqi şəxslər tərəfindən əldə oluna bilər. Ekoloji təmiz gələcəyə yatırım etmək istəyən investorlar müraciət üçün linkə keçid edə bilərlər: https://unicapital.az/unibank-istiqrazlari-apply/

Yaşıl istiqraz kimi təsnifatlaşdırıla bilən bu qiymətli kağızlar, Astana Beynəlxalq Maliyyə Mərkəzinin müsbət rəyi(SPO) ilə buraxılır. Qeyd edək ki, bir müddət öncə Unicapital İnvestisiya Şirkəti və Astana Beynəlxalq Maliyyə Mərkəzinin (AIFC) nəzdindəki “Yaşıl Maliyyə Mərkəzi” arasında Referal Saziş imzalanıb.

Hərrac “Unicapital İnvestisiya Şirkəti” ASC-nin anderraytinq dəstəyi ilə Bakı Fond Birjasında birqiymətli hərrac üsulu ilə (nominal qiymətlə) həyata keçiriləcəkdir. Unicapital marketmeyker qismində çıxış edərək, qiymətli kağızların təkrar bazarda gündəlik alışı və satışı öhdəliyini üzərinə götürür.

Bank istiqrazlarının emissiyasından əldə ediləcək vəsaitlər bərpa olunan enerji mənbələri, çirklənmənin qarşısının alınması, təmiz nəqliyyat, iqlim dəyişikliyi kimi yaşıl, sosial, dayanıqlılıq prinsiplərinə uyğun layihələrin maliyyələşdirilməsinə yönəldiləcək.