“Unicapital İ.Ş.” ASC “Fintex Summit 2023” də “ƏSAS TƏRƏFDAŞ” nominasiyası üzrə mükafata layiq görüldü

13-14 iyun 2023-cü il tarixlərində “Unicapital İnvestisiya Şirkəti” ASC Azərbaycan Banklar Assosiasiyasının təşkilatçılığı, Azərbaycan Fintex Assosiasiyasının, Azərbaycan Respublikasının Mərkəzi Bankının, Azərbaycan Respublikası Rəqəmsal İnkişaf və Nəqliyyat Nazirliyinin, Azərbaycan Respublikası İqtisadi İslahatların Təhlili və Kommunikasiya Mərkəzinin dəstəyi ilə “Bank və maliyyə ekosistemində yeni trendlər: innovativ həllər, fintex və təhlükəsizlik” mövzusunda keçirilən iki günlük “Fintex Summit 2023” adlı sammitdə tədbirin əsas tərəfdaşı qismində iştirak edib.

Sammit iştirakçılarının böyük maraq göstərdiyi “Unicapital”ın stendində əməkdaşlar tədbir iştirakçılarına və qonaqlara şirkət və xidmətləri haqda ətraflı məlumat təqdim edib.

Müxtəlif panellər üzrə davam edən tədbirdə “Unicapital İ.Ş.” ASC-nin Baş Direktoru Vüqar Namazov öz çıxışı zamanı, investisiya xidmətləri ilə ödəniş sistemlərinin və mobil bankçılıq məhsullarının inteqrasiyasının önəmliliyi və bu istiqamətdə “Unicapital İ.Ş.”nin təqdim etdiyi həllər, rəqəmsal mühitdə yaranan risklərin idarə edilməsi, şirkətin son illərdə investisiya sahəsinə verdiyi əvəzsiz töhfələr və yeni rəqəmsal həllərlə yerli və xarici maliyyə bazarlarına əlçatanlığın təmin edilməsi haqda məsələlərə toxunub.

Tədbirin sonunda “Unicapital İ.Ş.” ASC sammitdə iştirakı və dəstəyinə görə “ƏSAS TƏRƏFDAŞ” nominasiyası üzrə mükafata layiq görülüb.

Maliyyə sektorunda rəqəmsallaşmada yeni trendlər, innovativ həllər və maliyyə texnologiyalarının əsas müzakirə predmeti olduğu sammit, maliyyə-iqtisadiyyat sahəsinin müxtəlif sektorlarının rəhbər, rəsmi nümayəndə və səlahiyyətli şəxslərinin iştirakı ilə baş tutub.