Maliyyə bazarlarına həftəlik baxış

Daxili Bazar

• 3 may tarixində AR Mərkəzi Bankı faiz dəhlizinin parametrləri ilə bağlı qərarını açıqladı. Qərarda uçot dərəcəsi 0.25 faiz bəndi artırılaraq 9%-ə, faiz dəhlizinin aşağı həddi 0.5 faiz bəndi artırılaraq 7.5%-ə, faiz dəhlizinin yuxarı həddi isə 0.25 faiz bəndi artırılaraq 10%-ə qaldırılmışdır. İnflyasiyanın daxili və xarici risklərini nəzərə alaraq Mərkəzi Bank antiinflyasiya xarakterli pul siyasətini davam etdirir. Mərkəzi Bankın məlumatına əsasən, faiz dəhlizinin parametrlərinə dair qəbul edilən qərarların təsiri ilə banklararası təminatsız pul bazarında orta faiz dərəcəsi ilin əvvəlindən bəri 1.2 faiz bəndi qalxmışdır. İllik inflyasiya göstəriciləri və proqnozlarının davamlı olaraq azalması halında əvvəlcə pul siyasətinin sərtləşdirilməsi üzrə pauza götürüləcək, sonra isə onun normallaşdırılması, yəni azaldılması imkanları nəzərdən keçiriləcəkdir. Pul siyasəti ilə bağlı növbəti qərar barədə məlumat ictimaiyyətə 2023-cü il iyun ayının 21-də açıqlanacaqdır.
• Ötən həftə AR Maliyyə Nazirliyinin 2 illik istiqrazlarının hərracında tələb təklifi(hərraca çıxarılan ilkin həcm) 4 dəfədən çox üstələmiş, yerləşdirilmiş həcm 45 milyon AZN olmuşdur. Hərrac 6.98% orta ölçülmüş və 7.07% kəsmə gəlirliliklə nəticələnmişdir. Aprel ayında keçirilmiş 2 illik istiqrazların hərracında bu göstəricilər müvafiq olaraq, 7.16% və 7.24% idi.
• AR Mərkəzi Banklarının notlarında gəlirliliklər artmaqdadır. Belə ki, keçən həftə keçirilən 28, 84, 168 və 252 günlük not hərraclarında orta ölçülmüş gəlirliliklər 6.89%-8.90% (bundan öncəki 6.60%-8.77%) aralığında olmuşdur.

Qlobal bazar

• 3 may tarixində ABŞ FED faiz dərəcələrini gözləntilərə uyğun olaraq 0.25% artıraraq 4.75%- 5.00% səviyyəsindən 5.00%-5.25% səviyyəsinə çatdırdı. ABŞ-da faiz dərəcələri 2007-ci ildən bəri ən yüksək həddə çatıb.
• ABŞ-da əmək bazarındakı dəyişikliklər müsbət tendensiyada davam edir. Analitiklər ABŞ-da işsizliyin artmasını proqnoz etsələr də keçən həftə açıqlanan məlumata əsasən işsizlik dərəcəsi 3.5%-dən 3.4%-ə düşmüşdür. Gözlənti 3.6% idi. Həmçinin, qeyri-kənd təsərrüfatı sahəsində iş yerlərinin sayındakı dəyişiklik də artaraq 236k-dan 253k-a yüksəlmişdir. Bu göstərici üçün də bazarın gözləntisi bədbin, 185k idi.
• Bu həftə, 10 may tarixində, Bakı vaxtı ilə saat 16:30-da ABŞ-da istehlak qiymətləri indeksi açıqlanacaq. İnflyasiya göstəricisinin dəyişməyərək 5.0% qalacağı proqnoz edilir.
• Ötən həftə Avropa Mərkəzi Bankı da faiz dərəcələrini 0.25 faiz bəndi artıraraq uçot dərəcəsini 3.50%-dən 3.75%-ə qaldırdı. Avropada inflyasiya artaraq 6.9%-dən 7.0%-ə yüksəlib.
• Bu həftənin cümə günü Rusiyada inflyasiya məlumatı açıqlanacaq. İnflyasiyanın azalaraq 3.51%-dən 2.40%-ə düşəcəyi proqnoz edilir.
• Türkiyədə inflyasiya azalmağa davam edir. Aprel ayında inflyasiya azalaraq 50.51%-dən 43.68%-ə düşmüşdür. Analitiklərin gözləntisi 44.10% idi.