Yerli və qlobal bazarların həftəlik analitikası

Daxili Bazar

• Ötən həftə AR Maliyyə Nazirliyinin 50 milyon AZN həcmində 3 illik istiqrazlarının yerləşdirilməsi üzrə hərrac keçirilmişdir. 3 illik istiqrazların gəlirliliyi ötən aylara nəzərən azalmış, orta ölçülmüş və kəsmə gəlirliliklər, müvafiq olaraq, ötən hərracla müqayisədə 8.37%-dən 8.00%-ə və 8.75%-dən 8.20%-ə düşmüşdür.
• Bu həftə AR Maliyyə Nazirliyinin 30 milyon AZN həcmində 2 illik istiqrazlarının hərracı keçiriləcək. Bundan əlavə, Maliyyə Nazirliyinin məlumatına əsasən, may ayı ərzində 30 milyon AZN həcmində 2 illik, 50 milyon AZN həcmində 3 illik və 20 milyon AZN həcmində 5 illik istiqrazların yerləşdirilməsi nəzərdə tutulub.
• AR Mərkəzi Bankı not hərracları vasitəsilə sterilizasiya əməliyyatlarına davam edir. MinFin istiqrazlarının gəlirliliklərində azalma müşahidə edilsə də AR Mərkəzi Bankının notlarında gəlirliliklər artım tempini göstərir. Ötən həftə 28, 84, 168 və 252 günlük not hərraclarında orta ölçülmüş gəlirliliklər 6.60%-8.77% (bundan öncə 6.24%-8.48%) olmuşdur. Xatırladaq ki, ötən ay Mərkəzi Bank notların investor bazası ilə bağlı qərar qəbul etmişdir. Not hərraclarında rəqabəti artırmaqla müxtəlif müddətlər (1/3/6/9 ay) üzrə gəlirlilik əyrisinin formalaşmasına şərait yaratmaq, qısamüddətli pul bazarında aktivliyi dəstəkləmək üçün notlar üzrə investor bazası genişləndirilmiş, notların yerləşdirilməsi şərtlərinə dəyişikliklər edilmişdir. Qərara alınmışdır ki, banklarla yanaşı qeyri-neft və qeyri-dövlət sektorunda fəaliyyət göstərən rezident kommersiya hüquqi şəxsləri də (maliyyə və sığorta fəaliyyəti ilə məşğul olan hüquqi şəxslər istisna edilməklə) müəyyən limitlər tətbiq etməklə notlara sahib olmaq hüququ əldə etsinlər.
• 3 may tarixində AR Mərkəzi Bankı faiz dəhlizinin parametrləri ilə bağlı qərarını açıqlayacaq. Mərkəzi Bankın məlumatına əsasən, inflyasiyanın dinamikası, proqnozun hədəfdən yayınma səviyyəsi və risklərin qalıcılığından asılı olaraq veriləcək. İnflyasiyanın azalacağı ilə bağlı proqnozlar özünü doğruldarsa pul siyasətinin normallaşdırılması imkanlarına baxılacaqdır.

Qlobal bazar

• ABŞ-da işsizlik üzrə analitiklərin gözləntiləri bədbin olsa da açıqlanan məlumatlar işsizliyin hələlik müsbət istiqamətdə dəyişdiyini göstərir. Belə ki, 22 aprel tarixi üçün hesablanan məlumatlara əsasən, ABŞ-da ilkin işsizlik müraciətləri azalaraq 245k-dan 230k-a, cəmi müraciətlərin sayı isə 1865k-dan 1858k-a düşmüşdür. İqtisadçılar növbəti işsizlik müraciətlərində və işsizlik dərəcəsində də artım gözləyirlər.
• Həmçinin, 5 mayda ABŞ-da əsas məşğulluq göstəricilərindən biri olan qeyri-kənd təsərrüfatı sahəsində iş yerlərinin sayındakı dəyişiklik məlumatı açıqlanacaq. Analitiklər göstəricinin azalaraq 236k-dan 180k-a düşəcəyini proqnoz ediblər.
• Ötən həftə ABŞ-da 2023-cü ilin birinci rübü üçün ÜDM artım məlumatı açıqlanıb. ÜDM artımı azalmış və eyni zamanda gözləntilərdən (1.9%) də az olaraq 1.1% (bundan öncə 2.6%) açıqlanmışdır.
• 3 may tarixində ABŞ Mərkəzi Bankı faiz qərarını açıqlayacaq. Faizlərin 0.25% artırılaraq 4.75%-5.00% aralığından 5.00%-5.25% aralığına çatdırılacağı gözlənilir. Xatırladaq ki, mart ayında ABŞ-da inflyasiya 6.00%-dən 5.00%-ə düşmüşdür. Hələ ki, aprel ayı üçün proqnoz inflyasiyanın dəyişməyərək 5.00% qalacağı fonundadır.
• Avrozonada ÜDM artımı azalaraq 1.8%-dən 1.3%-ə düşüb. Analitiklərin gözləntisi 1.4% idi.
• 2 may tarixində Avrozonada inflyasiya məlumatı açıqlanacaq. Analitiklər istehlak qiymətləri indeksinin artaraq 6.9%-dən 7.00%-ə qalxacağını proqnoz ediblər.
• 4 may tarixində Avropa Mərkəzi Bankının faiz qərarı açıqlanacaq. Əsas uçot dərəcəsinin 0.25% artırılaraq 3.50%-dən 3.75%-ə çatdırılacağı gözlənilir.
• Ötən həftə Rusiya Mərkəzi Bankı əsas faiz dərəcəsinin sabit, 7.50% saxlanılması barədə qərar qəbul etdi. Xatırladaq ki, Rusiyada inflyasiyanın azalaraq 3.51%-ə düşməsi açıqlanmışdı (mart ayı üçün).
• Ötən həftə Türkiyə Mərkəzi Bankı da uçot dərəcəsinin sabit, 8.50% saxlanılması barədə qərar qəbul etdi. Türkiyədə inflyasiyanın azalaraq 50.51%-dən 44.25%-ə düşəcəyi gözlənilir. Xatırladaq ki, Türkiyədə istehlak qiymətləri indeksi ötən ilin sonuna 64.27% idi (ondan əvvəl isə 84.39%).